Dayak

Dayak
Baka rumah tinggal tiang
Nadai perabung
Tekebu atap
Engkiai tepelintang
Tasau kediri ririh limpang
Nuntung di punjung jauh kangau
Singkang tekelambang

Dayak
Baka telu matok retai
Kerungan pesok
Tansang basah
Tenchang panas teritik ujan biau balai
Kerubong rimpak
Anak mati but ngabu malai alai
Mechah nadai
Ngair temawai lelaman lengang

Dayak
Baka duku nadai sentagai
Tusah di tangkin mar dipegai
Sarung pechah simpai tekusai
Litan telih rajai berintai
Darah menanah lubah gerai
Singkang tepawat
Pejalai lelai
Punggung cengkik
Ensembul kerigai
Lengah pejalai tekuing singkang

Dayak
Nuan tetap bansa aku
Darah enggau kedap besumbu tunu
Tenggelam nuan lemas meh aku
Sulai nuan danjan meh aku

Aram Dayak
Angkat semua
Dirika Pemun tiang Merdeka
Seput berintai nyadi terabai
Belakang betinggang nyeligi berayang
Lengan mepat bejabung nyabur
Kaki ngansau darah langkang
Sejengkal mansang
Sekaki enda surut
Tanah Sarawak kelang menalan
AGI IDUP AGI NGELABAN

Sada ati@suluhsebauh022015
Credit Mr Luang Janbi Munan